2007 թվականի ապրիլից Նալբանդյան 48 հասցեում է գտնվում «ՀԱՅԲԻԶՆԵՍԲԱՆԿ» ՓԲԸ Գլխամասային գրասենյակը: Կառույցը 19-րդ դարավերջի եւ 20-րդ դարասկզբի արժեքավոր  ճարտարապետական հուշարձան է, 1901 թ.՝ Արքունական պալատն ու նահանգական գանձատունը (ճարտարապետ՝ Վասիլի Միրզոյան):

Շենքը կառուցվել է Փանախանի բուլվարում (ներկայի Սախարովի հրապարակի տարածքում), փողոցի կողմի ճակատները երեսպատված են երեւանյան սեւ տուֆով:  

1918 թ. այս շենքում է գտնվել Առաջին հանրապետության ֆինանսների նախարարությունը: Ապա այն դարձել է հիվանդանոց, այնուհետև կրկին այստեղ են տեղավորվել տարբեր վարչական կառույցներ:

1969 թվականին շենքը հանձնվում է ՀԽՍՀ Մթերումների նախարարությանը, որը զբաղվում էր գյուղատնտեսական արտադրանքի, հումքի մթերման և պահպանման հարցերով:

Տասնյակ տարիներ անց, 2007 թվականի ապրիլի 1-ից շենքի հասցեն գրանցվում է որպես «ՀԱՅԲԻԶՆԵՍԲԱՆԿ» ՓԲԸ Գլխամասային գրասենյակ:

Շուրջ 2 տարի տևողությամբ շինարարական աշխատանքներից հետո 2009 թվականի սեպտեմբերին ՀԱՅԲԻԶՆԵՍԲԱՆԿԸ հանդիսավոր կերպով բացեց  մայրաքաղաքի սրտում գտնվող  վերակառուցված շենքը, որտեղ պահպանելով հին արժեքները՝ ստեղծվել են ժամանակից պայմաններ բարձրակարգ սպասարկման և բանկային այլ ծառայությունների մատուցման համար:

ՀԱՅԲԻԶՆԵՍԲԱՆԿԸ, կարևորելով պատմամշակութային և ճարտարապետական արժեք ունեցող կառույցների պահպանումը, ջանք չի խնայում, որպեսզի մայրաքաղաքի դիմագծի մեջ իր ուրույն տեղը գրավող շենքն այսուհետ ևս ներկայանա անխաթար ճարտարապետական տեսքով և նույնքան գեղեցիկ դիտվի նաև ապագայում:

Վերջերս ՀԱՅԲԻԶՆԵՍԲԱՆԿԸ ընդլայնել է Գլխամասային գրասենյակի տարածքը՝  ներառելով Նալբանդյան 46 հասցեում գտնվող շենքը։